Landskampen i ebok: Noreg – Sverige 0-3
Borteseier denne gongen altså. Hæ, snakkar vi om fotball? Nei, dette er landskampen i ebok. Der svenskane er åleine på banen medan nordmennene sit i garderoben og sutrer over at bøkene deira ikkje får momsfritak medan dei så langt eg kan forstå går i same fella som musikkbransjen – i frustrasjon over at norspråkleg materiale ikkje er tilgjengeleg blir det konsumert musikk på engelsk1, lest bøker på engelsk2 og dessuten lasta ned ulovleg i stor stil. Folk får vanen at norske ebøker ikkje finnest og går til andre kjelder for å få tilfredsstilt leselysta si. Dette kan umogleg vere
I går såg eg ei bok av Jan Guillou som eg hadde lyst på i hylla på Coop. Pocketbok, og til ein svært overkommeleg pris – “Den indre fiende”3 kom ut i 2007 og går for tida på billegsal. Likevel likar eg ikkje å kjøpe bøker som er laga av daud vegetasjon, for det første har eg nettopp flytta og har bore nok tunge kassar med denslags opp på loftet, for det andre er det så utruleg upraktisk å måtte dra rundt på ein diger klump av ei bok når eg har ein suveren eboklesar i iPhonen min. Så eg droppa det kjøpet, og byrja leite etter “den indre fiende” som ebok.
Noko som ikkje er så lett. Den norske bokbransjen ser ut til å sitte på gjerdet og håpe at politikarane gjer om på vedtaket om at det er moms på ebøker, det einaste som møter meg på bokkilden.no er “Så snart e-bøker lanseres i Norge vil du finne komplett utvalg tilgjengelige norske e-bøker her på bokkilden.no! Foreløpig er dette kun en beta-side, med informasjon om e-bøker”. Svært nyttig. Lydbøker derimot er visstnok fritekne for meirverdiavgift dersom boka har vore utgjeven på papir frå før, så eg kan sjølvsagt vere einig med bokbransjen i at det burde vere fritak for meirverdiavgift òg for ebøker. Men det hjalp meg lite akkurat der og då, eg nektar å kjøpe bøker i anna enn DRM-fritt digital format.
Så kva no? Amazon hadde heller ikkje “Den indre fiende” som ebok. Men kva om eg sjekker dei svenske nettbokhandlane etter originaltittelen..? Å lese svensk er ikkje noko problem, så eg prøvde meg på Adlibris. Og bingo! Der var “Fienden inom oss” som ebok. Og ikkje nok med det, Adlibris har bøkene sine i DRM-fri epub også! Då kan eg lese boka på Macen, Linux-pøsen og viktigast: På iPhonen min med Stanza. Og for ein pris, 45,- svenske kroner inkludert meirverdiavgift. Merkeleg nok stoppar ikkje momsen svenskane frå å selje ebøker slik det gjer i Noreg.
Uansett, svanskane vann landskapen etter å ha scora desse poenga:
- Dei tilbyr faktisk ebøker på morsmålet deira.
- Prisen på ikkje heilt nye bøker er heilt overkomeleg.
- Dei sel bøkene i DRM-fritt format (rett nok med vatnmerke, men det er OK)
Eirik Newth har nok også meir enn eitt poeng når han skriv at “Dette handler om økonomi og forretningsstrategi” på bloggen hans – må innrømme at sett i lys av at svenskane klarer selge svenske ebøker med moms så ser det veldig ut som om den norske bokbransjen berre brukar mangelen på momsfritak som eit påskót for å kunne halde fram den gamle forretningsmodellen sin. For norsk litteratur si skuld håpar eg dei ombestemmer seg snart.
